العودة للخرطوم..!!
عمق آخر*
*هاشم الفكي رضوان
*العودة للخرطوم*
__________
راجعين على الخرطوم
راجعين خلاص يازول
رامين هموم سنوات
طفلا صغير يرضع
يادوب عمر شهرين
الليلة عاد أكبر
لابس قميص أخضر
زي خضرة الخرطوم
راجعين ومشتاقين
جيرانا في الحته
شارعنا والسكة
جفت سنين وسنين
حتى التراب يبكي
يتذكر الماضي
لو نطرا طارينا
في جلسة الحبان
لمة حُنان صادقين
راجعين على الخرطوم
رغم الفقدنا كتير
كم من {شهيد} و{أسير}
كم من دموع سالت
لي زول فقدنا سنين
ياربي بيتنا سليم؟
ذكراهو فيها حنين
حوشنا الكبير ماكان
لامي الكبار تحنان
الأوضة والديوان
صالون كبير واسع
فيهو الصور ألوان
الجدة والخيلان
اعمامنا والحبان
مشهد قديم راسخ
يارب تكون قاعدة
في رف جميل فنان
راجعين على الخرطوم
اشواقنا طالت كم
الهم مجاري الدم
الليل نجومو نعد
ضو القمر واعد
يرجع فرحنا نغم
ونغني للخرطوم
نسأل {حمار كلتوم}
ست اللبن كانت
دي رواية منسية
مكتوبة عن مظلوم
راجعين على الخرطوم
في قلوبنا ضمة ناس
الشوق مع الإحساس
والأيد تسالم الإيد
آمالنا تتحقق
فرحة صغار في العيد
راجعين على الخرطوم
ناسين هموم آهات
الباقي بس لحظات
نرجع نصيغ كلمات
عنوان كبير مكتوب
في زفة الأشواق
راجعين أكيد بالشوق ونوزع البسمات
بي ود رقيق مختوم
في كتاب كبير مرسوم
النيل صبح ضاحك
مجراهو كان محروم
من ملتقى المقرن
برتاح أمُر بي هناك
أجلس هناك كل يوم
النسمة من توتي
تعبُر تزيدني شجون
الحلوه جات تسأل
في عيونا باقي النوم
سهرانة ولهانة
رغم الألم مسكون
إلا الفرح جدد
قالت كلام معطون
يادوب رجعنا خلاص
الفرحة في الخرطوم
الفرحة في الخرطوم