وطن حدادي مدادي …ما بنبنيهو فرادي ولا بالضجة في الرادي ولا الخطب الحماسية

دبابيس

ودالشريف

قرار مجلس المريخ بحل إدارة الكرة قرار موفق …فطالما هنالك مدير رياضي ما فيش داعي للترهل والصرف في الفاضي …مدير كرة..مساعد مدير كرة …مدير اداري … ومش عارف ايه ….بس عايزين نعرف والمريخ عندو فريقين …واحد في رواندا وواحد في السودان …عايزين نعرف هل القرار شامل ناس السودان ….ومدير الكرة في مريخ السودان انس نصرالدين قاعد واللا غادر

** لو طبق مجلس المريخ ما قاله المغربي رشيد غلفاوي المدير الرياضي سيكون المريخ شيئا اخر وممكن ينافس في الدوري الاسباني حتي

** مجلس المريخ لم يتخذ أي قرار تجاه المدرب الصربي كما كان متوقعا وهذا رائع جدا لأننا مع استقرار التدريب و ليواصل الصربي المشوار حتي نهاية الموسم

** من القرارات المفرحة لمجلس المريخ ان وجه بضرورة الاهتمام بالملعب الرديف واكمال العمل فيه علي وجه السرعة وايضا مواصلة العمل بجدية في تأهيل الاستاد

** المشكلة ان المريخ بعيد عن جماهيره والعودة غير ممكنة في الوقت الحاضر وامس شاهدت مباراة قديمة عبر التلفون علي ايام العجب وفاروق جبرة وفي الاستاد ما لا يقل عن
60 الف متفرج ….متي تعود تلك الايام الزاهيات

** إعداد المريخ لدوري النخبة بطيئ جدا بل ولم يبدأ ونرجو ان يتحرك الاخ اللواء طه الحسين بعد ان تم اختياره رئيسا لبعثة الفريق …نرجو ان يتحرك فورا لتجميع كل اللاعبين وبداية الاعداد والوقت لا يسمح باي تقاعس وفرق
دوري النخبة ليست سهلة وحتي ان كان هنالك اتجاه لمغادرة الدوري الرواندي وإعادة الفريق للخرطوم لخوض مباريات دوري النخبة يفترض أن يبدأ إعداد الرديف ..

** نعم كنا قد نادينا بسحب المريخ من الرواندي والاهتمام بدوري النخبة والحمد الله ان مجلس ادارة النادي بدأ يستجيب والاتجاه الغالب هو عودة الفريق الاساسي للخرطوم للعب في النخبة واكمال ما تبقي من مباريات في الدوري الرواندي ..9 مباريات بعدد محدود من اللاعبين

** بالمناسبة.. هل اكمل المريخ المشوار في دوري بربر ام غادر دون استئذان من اتحاد بربر

** اسبوعين غياب للمريخ من الدوري الرواندي والمدرب الصربي رفض الراحة وكله اصرار علي مواصلة التدريبات وقرار عودة الفريق للخرطوم سيربك عمل المدرب الصربي ويعقد حساباته ….

** في حالة عودة الفريق الاساسي للخرطوم من يشرف علي التسعة مباريات في الدوري الرواندي ….ام ينسحب الاحمر نهائيا من الدوري الرواندي

** والله حكاية مريخ في رواندا ومريخ السودان ما داخلة الدماغ …لكن نعمل ايه ……الباقي باقي واصلو دنيا الحب محن

** انطلاقة دوري النخبة تاجلت من يوم 24 ابريل الي 26 ابريل وتقام في ملاعب رديئة لم ولن يكتمل تاهليها ….ليه كل العذاب ليه كل المحن يا حلفا

** كل الامنيات ان يكسب الهلال شكواه ضد لاعب نهضة بركان ويلعب في نصف نهائي دوري ابطال افريقيا

** كل المواقع لا حديث لها غير شكوي الهلال …..24
ساعة الحديث عن شكوي الهلال ….والاعمدة الهلالية اسكت خليها ساكت وكل واحد يفتي

** الاتحاد الافريقي اعلن عن جلسة استماع لعبد الكريم الكابلي ..اقصد استماع لشكوي الهلال في التاسع من ابريل ….قبل يومين فقط من موعد مباريات نصف النهائي لدوري ابطال افريقيا وفي هذا استفزاز للهلال

** أخطأ مجلس الهلال كثيرا وهو يتجه لمحكمة لوزان قبل أن يتعرف علي قرار الاتحاد الافريقي بصورة نهائية ……ليه الاستعجال …يا د حسن علي عيسي … …

** الهلال خسر نقطتين في الدوري الرواندي بتعادله مع مارينز 1…..1 وفلت من الهزيمة وطبعا حيقول ليك جان كلود مافي وكلوبالي مافي وروفا مافي وكرشوم مافي . …مدافع الهلال عثمانو ديوف بصق في وجه لاعب من الخصم ولم يتواني الحكم في طرده والتصرف قبيح ويفترض يعاقب من القطاع الرياضي

**المشكلة المريخ دائما ما يسهل من مهمة الهلال بتعادلاته المخيبة

** مبارتين علي التوالي وصلاح عادل لم يطرد ….حاجة غريبة

** غابت اخبار المنتخب الوطني الأول بعد عودته من السعودية

** كيف استعد الهلال وبقية الأندية خلاف المريخ لدوري النخبة ….افتكر الاهلي مدني سيكون الافضل اعدادا

** الاهلي العاصمي يحيي ذكري شهدائه ..د علي كوباني …ياسر الحاج …وليد محمد عثمان …حسن كوباني ….محمود معاذ ….لهم الرحمة والمغفرة

** الزمالك اكتسح المصري برباعية واحتفظ بصدارة الدوري المصري .

** اخبار الفجر الابيض المظلوم شنو

** عاجل الشفاء للزميل ميسرة بلدو المراسل النشط من مدينة الابيض

** الرحمة والمغفرة للزميل
حسين كباشي شيخ المراسلين في مدينة الخرطوم بحري

** واحد وسخ منحط عديم تربية من كتاب الهلال وصفني بالكلب .. .تصورو

** من كتاب الهلال احترم. قسم خالد وياسر عايس وشجرابي

** فريق تبو تألق في دوري الثانية ارقو وانتصر علي الاهلي كرمة بهدفين دون مقابل بعد اداء رائع وحصل علي ثلاث نقاط غالية

** الأستاذة سعدية عبد السلام عاشقة المريخ وملهمته عادت من القاهرة بعد رحلة علاجية ناجحة ….حمد الله الف علي السلامة

** ضل الدليب يعود بالخميس باذن الله

** البنزين يزيد …اي حاجة تزيد والمواطن تعب شديد .وربنا يستر . . والحمد لله انتاجية القمح عالية في كل انحاء البلد

** اي زول يسيئ لقواتنا المسلحة والفريق البرهان لا علاقة له بالسودان

** وطن حدادي مدادي …ما بنبنيهو فرادي ولا بالضجة في الرادي
ولا الخطب الحماسية

** اخر دبوس

** هذا آفة من افات المريخ …نرجو ان يكون قرارا قد صدر بابعاده