دموع ماشة ودموع جاية
.. اضرب واهرب ..
عبدالمنعم شجرابي
*** نزح السودانيون ( مجبورين مضطرين ) دخلوا مصر آمنين ( وضيوف ) احترموا لأم الدنيا حسن ضيافتها والقاهرة ما كانت قبلهم ( مدينة أفلاطون الفاضلة ) حتى يحسب للسودانيين كلهم تفلت سوداني واحد وشعوب الدنيا كلها
( بفجورها وتقواها )
*** الوضوء قبل الصلاة وقبل أن يحدثنا ( السادة الكرام ) عن سودان ما بعد الحرب عليهم الحديث عن وقف الحرب
( والباقي هين )
*** الولاية الشمالية في ( أمن وأمان ) والشاهد ألا ( لسان ) شايقي ولا دنقلاوي ولا محسي ولا حلفاوي نازح وفي وجود ( زحمة) من الفنانين بالقاهرة لا يوجد ( فنان طمنبور )
ويا رب أنعم بالمزيد من الأمن والأمان على أهل الشمالية
*** الزول ده يقول ما لا يفعل
الزول ده يتعهد بما لا يستطيع
الزول ده يوعد بلا مقدرة
الزول ده كده وحيظل كده
*** يا خوف فؤادي من غدي
*** بمناسبة نشر أخبار الموت بالوسائط بحسن أو سوء النية ترافقت والراحل الشندواي خليل بشير للشاعر أبو آمنة ( لنعزيه ) فقال بسخريته المعهودة أنا أول زول يتلقى العزاء في نفسه خارج الصيوان وما عظم شرفي وأنا أرى وجوه المعزين ضاحكة
رحم الله أبو آمنة المبدع بدرجة جنرال
*** خاطبت اللجنة الأولمبية المجلس السيادي بخطورة إيجار وزارة الشباب المدينة الرياضية للدعم السريع ( مخازن ) وللعلم فالطرفان الموقعان هما وزيرة الشباب والرياضة هزار وحميدتي ولا تعليق على قرار تكوين لجنة لإعادة تأهيل الملاعب طالما هو ( كلام والسودان )
*** باقة ورد لمرافقي الجرحى باقة ورد ندية للذين يجعلون جوارحهم جوارح للآخرين ويقاسمونهم الآلام
*** من مدن وقرى الجزيرة اتجه التهجير القسري إلى مدن وقرى النيل الأبيض والشهداء في زيادة والخراب والدمار في ارتفاع
( ودموع ماشة ودموع جاية )
لا للحرب ..
