دولة امدرمان

بقلم :أمير أحمد السيد

بالله عليكم اذا قررتوا تقسموا السودان ده نحنا عاوزين امدرمان دولة لوحدها نحنا كنا عايشين في امدر افضل من كل دول العالم فينا كل الاجناس والمخلوقات من الجن وكل انواع الحيوانات عايشين مع بعض وبنحب بعض بالله عليكم سيبونا في حالنا نحنا لا من الشمال ولا من الشرق ولا من الغرب ولا من الجنوب نحنا جنس واحد اسمه اولاد امدرمان عليكم الله خلونا في حالنا نحنا كده مبسوطين وينحب بعض كلنا وجنسنا واحد اولاد قلبا وفينا المسلم والمسيحي واليهودي والبوذي وفينا اللاديني ذاتو عليكم الله خلونا وسيبونا في حالنا نحنا ناس شعر وناس ادب وناس علم وثقافة ووعي وونسات ولمات بنحب بعض ياخ وبجنون من شارع الفيل لي حمد النيل ومن احمد شرفي لاي عشرين وكرري لاي الشيخ الطيب والسرواب وامبدات للابيض وناس المك ناصر لاي ايد الحد وجبيل الطينة
نحنا لادناقلة لامحس لا حلفاويين لانوبه لادينكا لا مسيرية لا فلاته لا تاما لا برنو لا برتي لا فور لا رزيقيه لا بقاره لا اباله لا بجا ولا بني عامر لا جعليين لا شوايقة لا انقسنا لا شوام لااقباط لا هنود لا افارقة ولا عرب لا ارمن نحنا اولاد امدرمان نحنا اولاد قلبا وسنظل اولاد امدرمان نغني الحقيبة وترقص احيائنا كلنا موردة (سوني عبدالباقي) نعشق الحياة ونعشق امدرمان نعم انا اول المؤمنين بان هناك قومية اسمها الامدرمانيين وهي خليط من الحب فقط من الحب