مورال فوق
الشاعر دفع الله الكردفاني يغني للمشتركة
مورال فوق
سابتين انحن جبال في الدنيا ما بتنشال
يا خيتي هزي الايد دام الحرس مورال
فارسنا ماهو جبان قاهر كما البركان
بمرق حقيقه عيان زي الهلال البان
شنب الاسد يااخوان داك فاشر السلطان
مشتركه ديل شجعان سم بجري في الوردان
مشتركه عز وامان في كافة السودان
قلبا” حديد ما لان ان قطا السما الدخان
الفي السلام اخوان مافيها زول خوان
الشرفو السودان عدوها قام عجلان
جري النم علي فارس العجاجا بلاوي
فل مارشال قهر ود الاسود مناوي
جنزير الحديد اوعك تجيهو تقاوي
في الميدان هناك فرسه وصمود وحكاوي
جبريل اب جناح تيتل بدق بقرونو
لا باع الوطن لا مره فكر يخونو
اجدادو الاسود الدوذنوها فنونو
بارع في الجمال سوداني اسمر لونو
صلاح رصاص مع الرصاص صمود وكمال
حار دنقابه في اليوم المصايبو تقال
قول عبدالله يحي اللي التقيل شيال
ما بخاف الكتال ساعة الحرابة رجال
تمبور الملك واضح كلامو عديل
يوم نادا الوطن ماقالو عنو بخيل
وليد الجنا الفارس العنتيل
موروث الشهامه شالو جيل عن جيل
خيي ايد في ايد انحن نجدع لي بعيد
معروف الدق كتير بلين للحديد
جندي المشتركة داك الموت بشوفو عيد
في الصحرا اسود عديل تاريخا” ما جديد
مشتركه رجال عديل ما بترترو لي ورا
الواحد منهم ما بقولو كبرا
الموت ما بخافو ديل اللي السودان ضرا
في شمالو والجنوب في شرقو والقروب
في عيونهم جوهرا
البلد البكون حراسو وطنيين
ديل مشتركه لا بتنساق ولابتلين
بتمرق بره زي نور الشمس بينين
وهبو الروح عشان شعب الوطن مارقين
مورال مر ساعة العين تلاقي العين
بطل واحد بيوزن في الخصيم الفين
كبار قاداتا في اليوم اب كلاما” شين
سريعين همه فوق شنب الاسد راكزين
عشان سوداننا يبقي سمح وهبنا الروح بلا تكليف
عشان سوداننا يبقي سمح انحنا جماعه ليهو نقيف
عشان سوداننا يبقي سمح بلا قبليه او تحريف
عشان سوداننا يبقي سمح تنميه تبقي واصله الريف
عشان سوداننا يبقي متوج يبقي فوق الفوق
عشان سوداننا يبقي نقيف نملاهو همه وزوق
عشان سوداننا يبقي سمح عزيز لي كافة المخلوق
عشان سوداننا يبقي سمح صمد مورالو شامخ فوق
دفع الله سعيد الكردفاني
