يعاد لورشة عطبرة
أضرب وأهرب
عبدالمنعم شجرابي
*** لا غبرته الحرب ولا هزته محنة فالانسان السوداني ما برح متكافل بجود بالموجود ( والعندو يدي الما عندو ) والجيب واحد تحت شعار ( الفقرا اتقاسموا النبقة )
*** عندما كنا صغاراً عرفنا من صنع المصباح ومن صنع القاطرة ومن اكتشف الجاذبية وعرفنا أن المهندس الروسي ( كلاشنكوف ) صنع البندقية التي سميت باسمه وصرنا كباراً وإلى الآن لم نعرف من صنع الرصاصة .. وهل مات بها أم اكتفى بأن يموت بها الملايين غيره ؟!
** قناة النيل الأزرق ظهرت شاشتها وقناة البلد في الطريق وعاطف محمد الحسن مدير قناة الشروق ( يحارب لعودتها ) والفضائيات في زمن الحرب طائرة ومدفع وخندق ومخيم ومستشفى ومدرسة وجامعة ونشيد وأغنية
*** مفكك .. ضعیف .. مهلل .. خطوطه الثلاث كل واحد فيها ( مبهدل ) أكتر من الآخر .. ظهر بلا شکل له ولا شخصية وعيوبه ما أكثرها
تشکر دورة نيجيريا التي أهدت المريخ عيوبه
*** الزول ده يمشي خطوة يرجع خطوتين
الزول ده يقرر ويمسح
الزول دہ يؤكد ويتراجع
الزول ده يوافق ويرفض
الزول دہ واقف محلك سر
*** مع التطور الهائل في الذكاء الصناعي يتطور ( الغباء السياسي ) السوداني والشاهد عبارة ( الما معانا ضدنا ) والأخطر ( يا أنت يا أنا )
*** يرقد بإحدى مستشفيات القاهرة الإنسان الجميل رئيس اللجنة الأولمبية السودانية السابق ويا صديقي العزيز هاشم هارون سلامتك وألف عزيز كرامتك
واذا شفیت شفي الناس كلهم
*** تأسفت من قبل وأعود متأسفاً على شعار أعطني قرشاً اعطك مسرحاً والذي ضاع حل مكانه أعطني ( طلقة ) أعطك ( جثة )
*** المشكلة النقص الكبير في الكوادر الطبية والمشكلة الأكبر عدم وجود المستشفيات التي يمكن أن يمارس فيها ما تبقى منهم العمل وبلد بلا صحة ( مقابر )
*** وعن السفارة السودانية بالقاهرة ( حاقولكم واقولكم ) ويلا انتظروا كلكم
*** مع ثقل أوزان المريخ العظيم والهلال الأعظم تقبل الرياضة الألوان الأخرى وفي السياسة ( يا كوز يا قحاتي ) ولا توجد ( منطقة وسطى )
ورياضيون والأجر على الله
*** بالعاصمة السعودية عقد الأهلة مؤتمرهم العام بعددية
اقتربت من عددية مؤتمر ( عاصمته أمدرمان )
مجموعة الهلال يجمعنا فازت بأغلبية كبيرة ومجموعة التغيير التي يرأسها الصديق والأخ عصام ود السكة خسرت ( وخسرت تاني ) وهي ترفض تقديم التهنئة للفائزين ويا ود السكة ( بطل زمزغة ) والانتخابات شرف وليست ( بلّي ) يلعبه الصغار ( في اللين بالبلية والجلية والضراب ) ود السكة ( خرخار ) ود ( السكة يعاد لورشة عطبرة )..
