ضل الدليب .. ودالشريف

ليتني زهر في خدك الزاهي ….. مقطع من الاغنيات الزواهر الخالدات غناها الراحل رمضان زايد من كلمات مبارك المغربي ولحنها عبد الله حامد العربي ومبارك المغربي كتب…. مرت الايام في الخيال احلام.. غناها عبد الدافع عثمان وتقريبا كل الجيل الحالي رددها اولاد وبنات وافضل من أداها مصطفي سيد أحمد..
مبارك المغربي أيضا كتب لابن البادية. ما عشقتك لجمالك وانت اية من الجمال… .. ما بصح وطريقنا باين يا شبابنا نقيف نعاين الأمل معقود علينا والعمل ظمأن إلينا…. مبارك المغربي تأثر برحيل ابنه غرقا ورحل عن دنيانا نهاية الثمانينات…. له الرحمة

** فنان أفريقيا الأول والأخير محمد وردي كان جلوسا بمكتب الشاعر سيد أحمد الحردلو في احد ايام العام 78 وقال للحردلو ما عندك حاجة يا اخ ممكن تغنيها واجابه الحردلو ما عندي… وقام وردي بفتح احد الادراج وقلب قلب ووجد… بلدي يا حبوب يا ابوجلابية وتوب وطار من الفرح وقال للحردلو هسي دي شنو ما غنية وخرج وكان قد تبقي لختام مهرجان الثقافة يوم واحد فقط وفرغ وردي من تلحين الأغنية مؤكدا علي عبقريته اللحنية ودعا الفرقة الموسيقية وبدأ البروفات صباح اليوم الختامي للمهرجان وذهب للمسرح القومي في المساء وغناها و رددها كل الشعب السوداني صباح اليوم التالي وكان المسئولين في الدولة حضورا وكان الحردلو حضورا في المسرح والتقي وردي عقب الحفل صدفة عند تقاطع كبري
ام درمان وقام الفنان الكبير بتسليمه استحقاقه علي الفور…… يا مقطعين دوباي نازلين على الدنيا…. اشواق وحنية…. يا مرمي تحت الشمس للقيلة ضلية…. يا سحنة نوبية يا كلمة عربية يا وشمة زنجية….. يا سمح يا زين

** عثمان الشفيع مبدع كبير غني في زمن الاستعمار. .. وطن الجدود نفديك بالأرواح نجود… وغني.. جنود الوطن لبو النداء خاضو المعارك بالدماء .. شكل ثنائية رائعة مع الشاعر محمد عوض الكريم القرشي وكانت القطار المرة.. مر فيه حبيبي والشاغل الأفكار واليوم سعيد وكأنو عيد يا الله يا الله حدائق البان جديد وغيرها من الروائع… ود القرشي عاش في الأبيض وارتبط أيضا بام درمان وله زكريات في شندي…. في الشاطئ يا حبان ساهرتو بينا…. يا حليل ربوع شندي…. بلد الجمال عندي

** سمعت لحن رائع للفنان جلال الصحافة يؤكد علي امكانته اللحنية ومن الممكن أن يلحن اغنياته بنفسه وستجد القبول.. .. بس جلال ما فاضي من الهلال

** زميلنا المبدع نجم الصحافة الفنية عبد الباقي خالد عبيد يتواجد في القاهرة من بداية الحرب واظنه بدون عمل للأسف وهو معد ومقدم برامج منوعات خطير وقدم اروع البرامج عير قناة انغام وقنوات أخري وجدت قبول كبير التقي فيها بشخصيات فنية وثقافية كبيرة وهذا ليس اعلان له ولكن اري ان الرجل يستحق التفافة من قناة الزرقاء وكل قنواتنا التي تبث من العاصمة المصرية وعبد الباقي بحضوره المميز سيرفع من شأنها ويعد مكسب كبير

** احد الأخوة أكد لي ان ابراهيم عوض لديه اغنية ثانية من الحانه خلاف تذكار عزيز… من كلمات عبد الرحمن الريح

** أؤكد مرة اخري ان الشايقية ناس مبدعين شديد خاصة في مجال الشعر الغنائي و كلنا طالعنا اشعار محمد سعيد دفع الله والسر عثمان الطيب وعبد الله محمد خير وابنعوف وشقوري وغيرهم…. تحتار وتقف طويلا عندما تسمع… الزول الوسيم في طبعو دايما هادي.. من اوصافو قول اسكرني هات يا شادي….. لا لا لا تقولي هي كدة استناني وين فايتني عابر.. ابقي انا ما الم فيك تاني من عارف المصاير…. كان تسافر شان تعرس خير ابوك مالي التكايا
شان مسافر شان عاجي بلقي في شوفتك دواي…. رصو الهديمات عدلو…. ركبو اللواريو قبلو … ما ينتم ليك مراد لا تضوق لا سمح لا زين

** برنامج اغاني وأغاني البرنامج التلفزيوني الشهير توقف حوالي ثلاث سنوات بسبب الحرب اللعينة وكان الأكثر شعبيه ومتابعة ايام المبدع السر قدور صاحب الضحكة الشهيرة ونحي خلفه الاستاذ مصعب الصاوي والبرنامج افرز لنا الرائعة مكارم بشير وفهيمة عبد الله والبندول وسوار الذهب والحمد لله لم تظهر فيه عشة الجبلية ولا مروة الدولية

** محمد بشير ابن الفنانة حنان بلوبلو قابض الجو في القاهرة وموجود في كل الاعراس والمناسبات وايضا ندي القلعة ظهرت بالقاهرة وغنت في حفل زواج عائلة شهيره خلال الأسبوع الماضي

** الفنانين الذين نطلق عليهم شباب وبعضهم تجاوز الاربعين سنة ماشة معاهم واخر. حفلات في القاهرة ودبي والدوحة وشايف في فنانة ظهرت بالسعودية

** انت لو داير بكاي… الف اهلا يا دموع….. واحدة من أروع اغنيات صلاح بن البادية.. كتبها محمد الجندي. وليس محمد يوسف موسي كما يعتقد البعض……. محمد يوسف موسي غني له ابن البادية كثير من الاغنيات منها. كلمة … فات الأوان.. حسنك امر…عايز اكون وغني له وردي عذبني وسيد خليفة صوت السماء. وغني له زيدان ابراهيم وثنائي النغم

** شاعر اغنية.. كنوز محبة.. لزيدان ابراهيم هو بشير عبد الماجد من أبناء بورتسودان. عاش في الدويم… سنوات طويلة وتوفي في بورتسودان والاغنية لحنها بشير عباس… تلقي فيها الريدة فاردة جناحها تشتاق للربيع

** من كتب الاغنية الشهيرة…. مبروك عليك الليلة يا نعومة… هو السر دوليب والذي تغني له الرائع عثمان حسين باكثر من اغنية… اشهرها … مسامح يا حبيبي وما بصدقكم

** فنان الخمسينات عبد الحميد يوسف اشتهر بأغنية غضبك جميل زي بسمتك… كلمات حميدة ابوعشر وسنعود لحميدة ابوعشر الشاعر المجيد بإذن الله

** الراحل عبد الكريم الكابلي اهتم باغاني التراث وأغاني الحماسة وقدمها بشكل رائع…. متين يا علي تكبر تشيل حملي……. مو ياك علي الخلاك اوي دخري

** قالو ليهو القطر تقدم كفرة نيرانا زي جهنم……. الزاهي في خدرو اروع ما غني احمد المصطفي من كلمات الصاغ ابوبكر

** الفنان أحمد فتح الله أحيا حفلا في دبي خلال هذا الاسبوع تابعه جمهور كبير من داخل المسرح وابدع في تقديم عدد من الاغنيات الخاصة والعامة

** رحلت عن دنيانا الاستاذه سكينة عربي أبرز الأصوات النسائية في الإذاعة السودانية…. كانت صاحبت صوت دافئ فيه حنية و جاذبية وقدمت اروع البرامج…. لها الرحمة والمغفرة

** كفي يا قلبي انسي الفات
وعيش، من تاني وحداني

ولو حنيت لعهد الشوق اجيب من وين عمر تاني