عسل الوطن هاشم الفكي رضوان
عسل الوطن
هاشم الفكي رضوان
____________
وطن يستاهل…
يكون جنب القمر قمرين…
وطن يستاهل…
يكون وسط العيون نورين…
ونبصم ليهو بالعشرة…
وطن والله يستاهل…
عشان كل النجوم تبرا…
وطن فوق السحاب ساكن…
ينزل في الارض مطرة…
يروي حقول… وتخضر كل يوم شجرات..وكم شجرة…
نمد إيدينا مترابطين…
نقطف كل يوم ثمرة…
وطن جوّا العيون حرفين..
يغذي شعورنا بالآمال…
كل مانغيب يزورنا حنين..
معاني الإلفة تتشابى..
نعزف ليهو في وترين…
وتر ألحانو حسية…
وتر في لوحة وطنية…
تظل الإلفة منهمرة…
وطن فيهو القلوب عامرة…
وطن ممتد على مد البصر سَهَلة…
محل ماإنت باقي هنا…
بِتطلع كلمة الإعزاز…
نشيد رايع…
منقول في جناح الطير…
محفوظ في ضميرنا غُنا…
بِقولوا كبيرنا في الساحات…
حتى الدابو شب صغير ولسا جنا…
جميل والله قول الأم…
تعال ياوليدي إنت عزاي..إنت ضنا…
وطن يستاهل
يكون جنب القمر قمرين
وطن يستاهل…
يكون وسط العيون نورين…
ونبصم ليهو بالعشرة…
هناك ساحات…
هناك خضرة…
أرض بِكرة…
بتسأل دايره بس نظرة…
تجيها الإيد…
وتزرع فيها كم شتلة…
ارض والله تستاهل تكون نضِرة…
لأنها في الشجون قطرة…
لأنها في القلوب ذكرى…
تجسد قيمة الأوطان…
يكفي النيل معاها دوام…
دوام والله لي بكرة…
جميع الناس… بتعرف كيف مقام أهلا…
وطن والله يستاهل…
تصافحو شمسنا من ضٌهرا…
وطن وسط الضلوع قاعد…
يمر جنب القلب شاهد…
عظيم تقديرنا للفكرة…
وطن رايع…
محال يصبح يكون ضايع…
يعيش بين الشعوب نكرة…
مؤسس من رجال صادقين…
تواريخ في الكتب حاضرة…
حضور دايم
بِعرفو السيرة والعُشرة…
وطن يستاهل التهليل…
فيهو النيل محل مايميل…
تلاقي قلوبنا مفتخرة…
وطن فيهو الشيوخ ظاهرين…
قبب ومسيد…
مناهج دين…
تلاوة..خلاوي منتشرة…
محبة سيّد الصادقين…
صلوات تبدأ من فجُرا…
وطن والله تستاهل…
يكون دائما مكانك زين…
ولي مجدك نكون رافعين…
دوام نحفظ وليك نقرا…
وطن الله يستاهل…
يكون عنوان…
رفعة شان…
هناك حيشان وكم ديوان…
نروي أرضنا…
بي خيراتنا بي تمُرا…
لو ضقنا العسل دا كمان…
نزيد والله من عسلا…
وطن والله يستاهل…
مدام حافظنو في الاعماق…
بِريدوابوي…
كمان الوالدة من صُغرا…
وطن يستاهل…
يكون جنب القمر قمرين…
وطن يستاهل…
يكون وسط العيون نورين…
ونبصم ليهو بالعشرة…
الصحافي/ هاشم الفكي رضوان ✍💕
٢٤/١/٢٠٢٦