الوجوه هي الوجوه

أضرب وأهرب 

عبدالمنعم شجرابي

 

*** بحثت ولم أجد فابحثوا علكم تجدون ( كباتن ) أو كابتن واحد ( بالمواصفات ) ليس لفرقنا الرياضية بل لحزب واحد من أحزابنا السياسية وما أحوج سياستنا ( للكابتن السياسي ) الذي اختفى ليكون الحزب ( مقطوع الراس )

*** القرار بتصعيد ستة فرق ( حتة واحدة ) وبلا منافسة للممتاز حررت له رابطة الأندية ( شهادة الوفاة ) والاتحاد العام واجبه ( الدفن ) وإنهاء القرار بانتهاء مراسم الدفن ولا عزاء

*** ينام الوطن على الحزن ويصحى على الحزن وكاد يقتات ويشرب الحزن ويتنفس الحزن واللون الأسود الحالك لون سمائه ( يبقى الأمل ) في عودتها صافية زرقاء

*** تجربته أمام النجم الساحلي ( شبعانة وتريانة ) وليت الهلال وجد تجربة ثانية وثالثة قبل لقائه الأفريقي الهام ليعرف ( البيهو ) ويعرف فلوران ( العليهو ) وتطمئن قلوب الأسياد

*** الزول ده روقوهو

الزول ده انصحوهو

الزول ده فهموهو

الزول ده قولوا ليهو بطل ركوب راس

*** الرياضيون بالعاصمة السعودية ( سري للغاية ) وصلكم ويقيم بينكم الآن قادماً من القاهرة كبير العائلة الرياضية فاتركوه اسبوع اسبوعين ( يبل الشوق ) في كريمته ريان وأحفاده وبعدها وكما عهدناكم اتصلوا وتواصلوا معه

ويا صديقي د. كمال شداد ( المجتمعي ) أمنياتي لك بإقامة طيبة في البلد الطيب ( ولاجتماعياتك ) كل الاحترام

*** باقة ورد للجارين في قضاء الحوائج .. باقة ورد ندية للناذرين أنفسهم في حلحلة مشاكل الناس

*** تتغير الأسماء وتتبدل من كتلة إلى كيان إلى تنسيقية ( والوجوه هي الوجوه ) بلا جديد وبقديم يعاد

*** الرصاص اللي ما يصيب يدوش ولا دخان بلا نار وإن كان تحت طاولة مجلس إدارة الهلال وميض نار ( فليلحقوها ) حتى لا يكون لها ضرام

*** ذكرت بعض المعتدلين بالهلال والمريخ من قبيلة ( هلاريخ ) فجاءتني إضافات كثيرة احتج فيها نادر مالك على عدم ذكر مهدي الفكي ناسياً نفسه ومتذكراً شباب الهلال وناسياً نهضة المريخ ولامني العطبراوي أمين بابكر الفاضل على عدم ذكر مولانا عبدالمنعم النذير أما المستشار عبدالله مسعود ذكرني بصديق الطرفين اللواء شرطة عمر علي حسن واحتج حامد بدوي على عدم ذكر فرقة ( الجو الرطب ) المريخية التي أقامت بمعسكر الهلال عموماً اعتذر فالقائمة طويلة طويلة على رأسها الجنرال المريخي منصور الحارث منصور وكفى

*** المركزية التي ( تمركزت ) في الخرطوم عاصمة البلاد وضاعت بسببها في الحرب معظم ما يملكه الوطن هاجرت وبكلياتها شرقاً لتصبح بورتسودان وحدها هي ( الكل في الكل )

ومحل الرئيس بنوم والطيارة بتقوم

..